יחזקאל 15 - Masoretic Text 1524

¹ ויהי דבר יהוה אלי לאמר׃

² בן אדם מה יהיה עץ הגפן מכל עץ הזמורה אשׁר היה בעצי היער׃

³ היקח ממנו עץ לעשׂות למלאכה אם יקחו ממנו יתד לתלות עליו כל כלי׃

⁴ הנה לאשׁ נתן לאכלה את שׁני קצותיו אכלה האשׁ ותוכו נחר היצלח למלאכה׃

⁵ הנה בהיותו תמים לא יעשׂה למלאכה אף כי אשׁ אכלתהו ויחר ונעשׂה עוד למלאכה׃

⁶ לכן כה אמר אדני יהוה כאשׁר עץ הגפן בעץ היער אשׁר נתתיו לאשׁ לאכלה כן נתתי את ישׁבי ירושׁלם׃

⁷ ונתתי את פני בהם מהאשׁ יצאו והאשׁ תאכלם וידעתם כי אני יהוה בשׂומי את פני׃

⁸ ונתתי את הארץ שׁממה יען מעלו מעל נאם אדני יהוה׃